من لديها فرصة اكبر للزواج الغنية ام الفقيرة

[*اليشمـــك*]

السلام عليكم

أخي القوس .. طيب مادام هوا راتبو بسيط .. ليش يشتري أرض ب 200000 ؟ وبيت بـ 300000 ؟

القناعة كنز لايفني ..

لو إن كل واحد مد رجليه على قد بساطو ماكان في مشاكل ..

ومن البداية يختار الزوجة اللي ممكن تعينو وتساعد .. الأفضل إنو يتزوج فتاة عاملة بحيث إنهم يساعدو بعض ويوفرو من الراتب مبلغ يساعدهم على شراء أرض ..

يعني فرضا الزوجة راتبها 4000 والزوج 5000 .. يوفروا 2500 من راتبها و 1500 من راتبو .. يعني خلال سنتين يكون معاهم 100000 .. وإذا استنوا كمان سنتين .. يكون معاهم تقريبا 200000 ... بس لازم يكون متفق معاها من البداية ..

وبعدين ليش الاستعجال .. إذا كان البيت لأولادهم من بعدهم .. لازم يتحملوا ويضحوا ويكون عندهم صبر ..

إما إذا كانو يبغو يتمتعو بحياتهم من بدري .. ممكن ياخدو قرض من البنك بس أنا ما أشجع القروض لانها زي الهم على القلب.. والحل الثاني هو الزواج من غنية .. وهادي راجعة للقناعات الشخصية ..

وبعدين إذا الرجل رضى على نفسو إنو يتسلف من زوجته عشان يشتري الأرض والبيت .. على الأقل يخلي عندو دم ويرجعلها المبلغ ولو حتى نصف المبلغ .. المسألة مسألة كرامة ومروءة .. وهادي ماتلاقيها هالايام ! ..

وبعدين أبو 5000 ريال في الشهر ماهو فقير ! .. أنا اتكلم عن الفقير اللي معاشو مايزيد على 1000 أو أقل كمان .. وهادا بالذات المفروض يقنع بالله ربي أعطاه .. أهم شي يوفر حياة كريمة لاولادو .. يوفرلهم مصروف يومهم ومصاريف مدارسهم وكل شي يحتاجوه .. وحتى لو احتاج سنين عشان يوفر مبلغ يشتري فيه الارض .. فزي ماقلت .. البيت لأولادو في المستقبل .. ولازم يجتهد في شغلو ويحاول يطور من نفسو ..

ولاتخاف اخي القوس .. الفقير الملتزم والمحترم .. احسن من الغني الجاحد المغرور البعيد عن الله ..
الدنيا لسة بخير والناس يخافو على بناتهم

المصيبة الأكبر لمّا يُقبَل الغني لمجرد إنو غني ..

والله يعين كل زوجين ويعطيهم القدرة على التوفير

تحياتي