وان غزا صدام الكويت أبغزيها معاه !

[khaleji]

يقول الشاعر: ــ

يا سليم ثنين قهوة تركي وواحـد بكيت ---------- موشته لا سبيل ابن العراقي لا ملاه

استريت إن جيتك وإن روح الوقت استريت ---------- قالها واحد من العالم وانا واقف حـذاه

والتفت وقلت يا قلب التعاسة وش بغيـت ---------- لو غرامك شربة الدخان ياحي الشـلاه

البلا آلما يزعج الخافق ونينك فالمبيت ---------- لين يرفع لي اذان الفجر وتقام الصلاه

اصلب من الكنكري إن خلطناه بالسميت ---------- صدمة الشيخان لا ذلوا .. لهم عيال الرعاه

والدفاع الصلب يكسره الهجوم المستميت ---------- والشجاع اللي يقارن مستواي بمستواه

ياهل الدوحه نصيحة كان رحتوا للكويت ---------- جنبوا عن سوق شرق حسبنا الله وعلاه

فيه بنت الهاص طاغية ٍ على بنت السبيت --------- وان لقاها شيبة الديمن تعثر في عصاه

من هنوف ٍ حبها قفى عليَ وما دريت --------- حطني في وجهة المدفع ولقاني قفاه

اتصل بارك الله فيك لا منك فضيت --------- والجهاز اللي تنادي لي معه عطني نـداه

ذا كلامك يوم اسمِّعك القصايد بيت بيـت -------- في الصميم وكل بيت ٍ ازين من اللي وراه

الله اكبر يوم وكدت لي الوعد وضويت جيت -------- من تولن وبديتتك على وادي المياه

انصدمت بعنف في مالا توقعت وغديـت ---------- دمع كاهل ما عرف طعم السعاده في صباه

كل ماقلت اللقا قلتي اصول الاتكيت ---------- ما يجوز موعد العشاق اسبق له لقـاه

لو حجزتي لي جناح ٍ ملكي وألا سويـت ---------- اللقا لابارك الله فيك لوفرض خلاه

موقع في الأرض ما لج فيه ذكرى لوفنيـت ---------- الظما والجوع لعيونك ولا زاده وماه

كن في قلبي مثل شجاره اجنوط الونيت ---------- لا شحطها اللي ظروف الوقت باحثت خفاه

اطعنيني لاجل اقول آه أبوصالح لا حييت ---------- وان رحلتي ماطعنتيني بعد ما اقول آه

سارع ما رحتي وأنا توي من الأعماق جيت ---------- قلت اعشقك من جديد وماياست من الحياه

والحقبقة مابغيت ابكي ولكني بكيت ---------- سالت ادموعي على ذيه وذاه

ادري ان ماعاد منها شي لكني استحـيت ---------- تحسبين اني بدون احساس وان قلبي صفاه

ان رحلتي والغلا له في ركون القلب بيت ---------- يحفظك من سخر الهدهد لبلقيسة سباه

لو ملكتي غطرسة هتلر وحنكة لزا بيت --------- ما تناسيتي ليالي الوصل والحب وجفاه

اندهي واقولك لبيه ياروحي فديـت ---------- ضحكة كنها مساء الخير من حلو الشفاه

انتي انتي سبة الغزو العراقي للكويت ---------- ولو غزى صدام مرة ثانية بغزي معاه