{ قصـــايد أعجبتني }

[الوردة الندية]

( المدينة و الغريب )


جاء يشوف الحال كيفه بعد ما هزه حنينـه
وقبل يسألني سألته كيف حالـك يالحبيـب

قال أنا كني غريبٍ ضيّـع أدروب المدينـه
قلت أنا كني مدينه تنتظر رجعـة غريـب

قال اجل وش فيك تكره سيرة الحب وسنينه
قلت اجل وشلون ما اكره سيرته دامك تغيب

أنت لامن غبت حتى مرايتك صارت حزينه
كيف ما تبغاني احزن وانت لي حظ ونصيب

الهدايـا والرسايـل والمكاتيـب الثميـنـه
والليالي والقمر والريـح والكـون الرحيـب

كل ما تبعد تجيب ليّه الشعـر مـن يدينـه
وتقعد جروحي تودي فـالطواريق وتجيـب

يابعد كل القصيـد ونـزوة إحـداه وأنينـه
لاذكرتك لاح بيت وطاح ورد وفاح طيـب

وان نسيتك مانساني صوتك المبحوح لينـه
ياخذ لجرحي بثاره من خطايـاك ويطيـب

وبعد هذا جاي ترمي ذنبك بوجـه المدينـه
ما دريت إن المدينه كلهـا شمعـة غريـب


للشاعر/ فهد المساعد

[نور الحياة]

غــــــــــاليـــــــــة

مشاري


قــالت اكتب فيني بيت من شعــــر
لأجل تشرحلي ، ترجملي غـــــلاي

قــلت ما يكفي لــو بكتب لك بحــــر
( غالية )اسمك ورسمك في حشاي

انتي شوقــي وانتي ذوقي لا حضــر
وانتي قـــمره عـــاليه تنور سمــــاي

لــكن اهيامي تــعب منه السطــــــر
والله ان حـــبك سكن بقصى حنــــاي

ايـــه احــــبك على طــول العمــــــر
وتنقص افــــراحي اذا منتي مـــعاي

يـــاغــــــلاتي يــا بساتين الزهـــــر
يــــاورود الحـــب كيف اروي ضماي

كثر مـــاشـــافت عيونــــي بالنظــــر
غير وجـــهك ماأظن يرضي هـــواي

كـــــل مـــاتطلب تــــرى عندي امــر
غـــــالية واللــــي تبينه هــــو مــناي

[الوردة الندية]

أنا إنســـــــــــــــــــان

أنا إنسان مع نفسي قبل لا اكون معك إنسان
لـي مبـدأ ولـي نظـرة تحكمني قناعـاتي

أحاسيسي حقيقـه ثابته بالوصل والهجران
أنا طبعي اذا حبيت .. أحب بكل حـالاتي

منادي والندا نابع من الوجدان للوجدان
إذا ما ينطق احساسي حديثي يشبه سكاتي

غموضي في الهوا تصريح وسره يفضح الكتمان
ونظـرات الوله والوجد هي أجمل عبـاراتي

ولا اجامل باحاسيسي ولا اقبل في الهوى احسان
ولا للمصـلحـه يـا سيـدي دور بعـلاقـاتي

ولو ألغي شعوري ما بقى لي صاحب ولا خـلاّن
يرافـقني على مر الزمـن جرحـي ودمعـاتي

أحب الصدق واعمل به كسبت أو كنت أنا الخسران
ولـو صـدقـي يخسّـرني تشـرّفنـي خسـاراتي

رفيق العمر لو تجفـا نبض الحرف والشريان
إذا ما غصت باعماقي .. متى تفهم معانـاتي

على كثر الخطا غافر ولا اغفر غلطة الخوّان
جزاه الصدّ والفرقا ولو عاندت رغبـاتي

ولولا العفو ما اخطينا ولا نحيا بلا غفران
خطايانا دليل إنّا بشر ومنّا الخطا ذاتي

على صدر الزمن بكتب شعوري موعد وعنوان
تعرف الشـوق لو فـتّـشت عن سر ابتسامـاتي

اذا كان الهوى نعمة بحطّك نعمة الرحمن
واذا كان الهوى غلطة بحطّك كل غلطاتي

الأمير الشاعر سعد آل سعود