اسولف مع نفسي .. لاتستغربون.......

[المنشق]

ياحليل بنت اخوي اسمها (ليان) مره ماخذها معاي نتمشى ومرينا من عند عمارة الوليد بن طلال اللي بالعليا ..قلت لها قولي يارب عط عمي شوي من فلوس الوليد بن طلال ...

قالت :هوعنده فلوس؟

قلت ايه ماشاءالله عنده فلوس واجد.

قالت: يعني عنده مليون؟

قلت: عنده ملايين واجد.

قالت: ليش ابوي ماعمري شفت معه ورقة مليون ..(بنت فقر)

---------------------------------------------------------
احلى شي عندي اذا كنت نايم بغرفتي .. وجابوا لي (عهد) ونوموها جنبي وقامت تلعب بوجهي ..وتحببني وتمعط شعري وتقول :ليث انت نومت تثيل مللله يوووه يالله دم ياكثلان..(يعني ..ليش انت نومك كثير مره يالله قم ياكسلان)
----------------------------------------------------
دايم اذا زعلت من وحده من اخواتي مااهاوشها ..لقيت طريقه حلوه تخليهم كل مابغوا يزعلوني تذكروا وش بسوي فيهم.. اقولها روحي سوي لي شاهي وقهوه .(مع العلم ان فيه كذا شغاله). واذا جابتهم قلت مابيهم رجعيهم .. يالله روحي نظفي غرفتي ..

-------------------------------------------------------
احب الاطفال مووووووت بس بعد مايدخلون المدرسه ماعاد احبهم ..
احب اجلس معهم اطول مده والعب معهم ...
-----------------------------------------------------
مادري ليه احس بقهر وزعل وتأنيب ضمير اذا جتني امي وقالت ..ممكن توديني السوق ياوليدي ..شوي والله ماراح اطول..(ليه تقولين كذا؟) قولي قم يالله ودني السوق .. انتي امي وان ماخدمتك انتي بعيوني من بخدم.
------------------------------------------------------
اشين لحظه عندي اذا دخل ابوي الملحق وانا جالس العب بلوت مع العيال ومتحمس مره وقال بلعب معكم ...وهذا لعدة اسباب..
1- ماعاد اقدر اسب العيال واضربهم بالطفايات.
2- ماعاد اقدر ادخن.
3- غشيم باللعب ومااقدر اقوله شي .
4- بنغير القناة على طول ( امزح ).
-------------------------------------------------------
اكره شي عندي اذا كنت واقف عند اشاره وشفت واحد حاط اصبعه في خشمه ومن الحماس شوي ويطلع مخه .. ودي اقطع الاشاره بهاللحظه.
---------------------------------------------------
اموت بشي اسمه الكوره ومتعصب لنادي الهلال ..بس اكره اللي يدورون بالشوارع بعد المباريات وجمهرتهم اللي تضايق الناس وقلة ادب بعضهم
-----------------------------------------------------
احرج موقف مر علي بحياتي ... مره كنت بالقاهره وكان فيه حفله لخالد عبدالرحمن ..وصار مشكله بينه وبين المتعهد والغيت الحفله واحنا كنا موجودين بالحفله .. وقالوا بالمكرفون روحوا رجعوا التذاكر وخوذوا فلوسكم .. نزلت برجع التذكره وكانت زحمه ورجعت التذكره واخذت فلوسي .. (الموقف المحرج عاد)
بعد يمكن شهر كتبت اعتقد مجلة اليقظه عن الحفله والمشاكل اللي صارت فيها ..وماحطوا الا صوره وحده بس ..صوره للجمهور وهم يرجعون التذاكر .. وانا طبعا كنت بارز بالصوره وجنبي وحده لازقه فيني مررره (يعني كنها معاي) شعر ولبس (لو مالبست شي استر لها)
طبعا لاتسالوني وش صار بعد ماشافوها الاهل والاصدقاء.
----------------------------------------------------
احب المكرونه مووووت ..وماحب الرز .. هههه احيانا تكلمني امي وانا في الغرفة تقول انزل تغدى .. اقول ماابيه (تصدقون اكون جوعان بس مافيني حيل انزل).. تغريني تقول تعال مسوين مكرونه .اذا قالت كذا اتنشط وانزل. انزل والقاهم مسوين رز ..
بس عاد نزلت ولا زم اكل .... المشكله قاهرتني دايم تلعب علي .
-------------------------------------------------------
مااحب احد يدخل علي بغرفتي وهو ماطق الباب .. بس مره صار موقف بعده تندمممممت على شي سويته ...
جالس في الغرفة شوي الا دخل علي اخوي الصغير 12سنه(محمد)
من دون مايطق الباب وبسررررعه دخل على طول صار جنبي يعني من الباب للمكتب اللي انا جالس عليه بخطوه وحده.. ضربته كف والله لااراديا (مااحب اضرب .. بس مدري وشلون ضربته)بكى وطلع ..
تصدقون بعدها ندمت واللي زاد ندمي انه المسكين جاي يبشرني انه ناجح.................يوووووه والله مااقدر اوصف لكم وضعي وقتها.
-----------------------------------------------------
احب العب مع (يزيد4شهور) ولد عمي..
بس سوى معاي حركه مالها داعي وصرت ماالعب معاه الا اذا حلفت لي امه انه مااكل شي اليوم ولا رضع حليب ...
جالس وحاطه بحضني والعب عليه .واقلّب فيه يمين ويسار. نفسي هفتني اني ابوسه بوسه مع شفته قووووووويه (هوايتي مع الاطفال اللي بعمره بس).. والولد الظاهر كان ماخذموقف مني ..طلع اللي في بطنه كله في فمي ... لا ومصوره فيديو بعد هههههه
------------------------------------------------------

اكره في (خالد) حبه للمظاهر .. ومحاولاته الفاشله بالتلزق بعيال النعمه.
--------------------------------------------------
احب في(سلمان) صراحته وعفويته ...ومواجهتك باخطائك
----------------------------------------------
اكره الصديق اللي يجيك بدون موعد ولايقدر ضروفك ... ولايسألك عسى ماعندك شي؟
--------------------------------------------------
مادري ليه انا رافض فكرة ابوي انه يكون صديقي ..
-------------------------------------------------
تعبت والله ... المجال مفتوح للجميع للكلام عن اللي في قلوبكم ..
اخوكم المنشق....

[فيافي]

سوالف حلوة
خليتنا نعيشها معاك
شكراً
تحياتي لك
فيافي

[جمال حمدان]

الأخ المنشق

جميــــــــلة جدا هذه الخواطر والسوالف
وكم تأثرت بقولك عندما كانت تطلب منك والدتكم
أطال الله في عمرها أي طلب ..... فوالله أنه البر بعينه
ولا نخالك إلا بارا بوالديك ... فبارك الله بك

أتحفنا بالمزيد يا أحلى ملقــــــــــوف على قلب
حبيبك جمال

[المنشق]

شكرا فيافي .. شكرا جمال ...


ترى المجال مفتوح للجميع ..اللي مايلقى موضوع يكتبه ..يجي هنا ويتكلم عن اشياء واجهها ولا اشياء يحبها والخرابيط اللي يواجهها ...