وليشرب نبيذ قصائدي العابرون!

بندر المحيا · #1 05-07-2006, 02:04 AM

" القناعات أشد شراً من الأكاذيب "
إيميل سيوران!

.
.
.
.
.

كثر ماأخسر كل شيّ
.......... كثر ماانسى اني ربحــت
الحزن :هو الدمعه:هيّ
............ لاتعتذر لي لو سمــحت
اطلع من الخفـّـاق زيّ
........ ذرة صخر من فعـْـل نحـت
لي حق.. لك حق ٍ عليّ
.......اذا جرحـت ولا انجـرحــت!
هاذي يدك ..هاذي يديّ
.... صح لي..وانا لاصحت ، صحت!
بـ اراودك لحظه ، وعيّ!
...... ولو ماتعبت ، انا استـرحـت!
يلعـنـك .. حتى (في يديّ
......... بيّن غيـابك) ليـه رحـت؟!
دوّرت فـ وجيـه آهليّ
....... ضحـكــة .. وناديتــك و

طــ

حـ

ت

!!!
!!
!

بندر المحيا · #2 05-07-2006, 02:10 AM

.
.
.
.
.
.
بلغة ٍ محكيّة، وتشكيل ٍ شعبيّ!
.
.
.
.

ذَهَب كل الكَلام وفْضّتَه يْوم السْكَوْت نـْحاس
............... قَبَل مَا اشَوفك آشَوفك نَهر مِن مَنَبَع عـْـذوبَهْ
احْبَك مِنْ زَمَانْ البَرَدْ..احْبك مِنْ زَمَاْن اليَاسْ
................ كْثْر مَا اْصْحَى مِنَ ايْام الْوْلَه وادخْل فْـ غِيبْوْبَة
أنْا وحْدي حَبِيْبْكْ لو قَرَيْتْك فِي وجِيْه الْنَاسْ
................... وَلْوْ وْجَهْكْ ذَنُوب ٍ مَالْهَا فِي سْجْدَتِي تَوْبَة
تَجِي مَثْل الْعَزَا بَعْدْ العَزا فِي غِيْبَة الأعْرَاسْ
............ وْتْروْح اْشْبَهْ بْـ دَمْعَة فـْ الْوَرَقْ بـْ الْصَمّتْ مَكْتَوْبَة
مَعَكْ حَلمّي مِنَ المَا وَالمَيْاهْ تْكَذِب الْغَطَاس
................. ياكْثَرْ الليْ غْطَسْوْا فِي حُبَك الْهَايجْ وغْرْقوْبهْ
مِجَارِيْح ٍ نَفَاهُم دَرَبَهُم لـْ عْيْونِك النْعّاسْ
................ تَعَدّوا يْنْشدونْ الْصَبَحْ عَنْ رمْشَك وضَاعَوا بْه
يْحَطَبونَ الْضْلْوعْ فـْ غَابَةْ ايّامكْ بَلْيّا فَاسْ
.................. شِتَاهُم ضِحْكَةْ شْفَاهكْ..وشَافوْا نَاْر مَشْبَوْبَةْ
تَخَاوّو بَيْنْ مِنْ دّوّر ذهِيبْ ومِنْ سَرحْ عَسّاس
................. حَيَارىً غّرهُمْ كَاذِب هَدَبْك وْ وجّهَوا صوبْه
وانَا الْبَارح عِيْونِي فِي عْيونِك مَرّهَا وسْوَاس
.................. بَنِيْت سْنِينِي البْيْضَا لْهَا طوبَهْ عَلَى طـوبَهْ
أردّك للحَدِيثْ بـْ لْهْفَةْ الْبَارِدْ بَلْيّا قِيَاس
............... وتْسْولِف سَالْفَةْ لليّ عَشَقْ مَا هِيْبْ مَرْغْوبَةْ
قِمْ اجْلِسْ فـْ الْحَنَايَا قَبْل مَا يْغْتَالكْ الْقْرْطَاسْ
............ شَعْرْتْ انِك تَبْي تَهْربْ وَرَى النِسْيانْ لـْ دروْبْهْ
أنَا مِحْتَاج لْك..مَا احْتَاجْ ليْ لاتَنْشْد الأنْفَاسْ
...........عَنْ اْكْبَر حَاجِة ٍ فـْ اقْصَى نْفَسْ شَاعِرْك مَحْجوبَةْ
طَويْلةْ طَاولتْنَا واسْتْقّرْ المَا بـْ قَاعْ الكَاسْ
................ كأنّ السَالِفَةْ غْيْمَةْ عَلَى شِفْتّك مَسْكوبَةْ
جَلَسْت مْقَابْلك وَجْهَاً لـِ وْجْهْ بـْ جَنبْيْ الهْوجَاسْ
................ إذَا مُستَقْبَلكْ وجْهْي ورَى الأحْلاَم مَرعْوبَةْ
نسِيتْ يّدي بـْ يْدينَك بـْ صُدفَةْ كنّها الإحسَاسْ
............ وذكَرْتْ إنِي نسيْت اذْكرْ يْديْنكْ كَانَت اعْجْوبَةْ
تَهَيلتكْ طَعَمْ هَيْل بـْ فَمْيْ مِنْ بَعْد طَعْم عْمَاس
.......... بـْ فِنْجَال ٍ نَعَسْ مِن نَظْرتْكْ بـْ اهدَابْ مْصْبَوبَةْ
سَرَىْ الليْلَ البَهَيمَ بـْ رِمْشكْ المُستَهْتِر الْخنَّاس
............... وليلَةْ غيرْ هَاذيْ مِنْ ليَاليْ العُمْر مَشْطوبةْ
إذَا مَا يْعْشَقْ العاشِق سَهَرْ شَكَواهْ بَعْد نْعَاسْ
............. يَنَامْ احْسَنْ لِه ويمسَحْ دَمْوعه فِي طَرفْ ثَوبهْ
إذَا مافجّرَ الشَاعِر قَصَيْدة صِدقَهَاْ نِبْراس
................ يبّل الدّفْـتَرْ ويشْربْ حِبَرْ كِذبه ومَكتَوبهْ
وانَا اعْظم مِن يْحِب اليَا هَدَا بَاله عِقْب مَا انحَاس
................ اعيْشْ بـْ كِبْرِيا والقَلبْ بَيْن يْديْن مَحبوبهْ
مْطَر هَذا الوصِل يومَ الهَجْر يمْلا الضْلْوعْ يْبَاسْ
............. وعَسَى المَاطِرْ عَلَى يابِسْ ضْلْوعيْ يْرخْي نْصوبهْ
مَنَ الليْ يشْبهكْ؟ يالفَاتِنْ المُسْتصْعِب الحَسّاس
.............. ليَا حَاولتْ اْشوفَكْ فـْ المَلاَمِحْ قَبْلْ هَا النَوبةْ
يذّكرنيْ بِـ مِنْ لايْشْبهِكْ مِنْ يْشْبْهِك لادّاسْ:
............ عَلَى اعْصَابِيْ سِفركْ ودوبْه ايْقظّ غَافْلكْ دوبْه
وانَا قَلبيْ وطْنْ أرضَهْ سِمَاكْ وبيتَهْ الكُراس
........... جبِينَك شَمسَهْ فـْ صُبحَ الوَلَهْ وجْروحكْ شعْوبهْ
انَا قدّامك اخْتّرنيْ حَبيبكْ قَبْل كِل النَاسْ
.......... أوْ إنِيْ مثْلْ عِشَاق ٍ هَووّ رِمشكْ وضــَاعْوا بهْ
.
.
.
العدد الأخير من مجلةِ حياة ِ النَاس ـ 2006م

بندر المحيا · #3 05-07-2006, 02:13 AM

عشرين عام مْن الغمام !!

سنين واسراب الطيور (اتـْدلّ) الاعشاش وتضيع!
.............. وانا الوحيد اللي رجع عشرين عام مْن الغمام!
رجعت ادوّر صوت جدي والمواسم والربيـع
.................. ليلة ورى ليلة ورى ليلة.. قبل عصر الظلام
وصلت منهك والوله يجتاحني لحظة واطيع:
............ للطين ، ظلْ النخـْل ، ريح الهيل ، تهديل الحمام
رجعت وحدي مالقيت الا غيابات الجميع!
.............. وجلست مع نفسي ادوّرني ورى طين الكـلام
أركيت ظهري واسترحت وقلت في نفسي بـبيع
................ صوتي لوحدي واختنقت ومت من قـل الزحام!
هذا أنا راجع من المستقبل المُر الفظيع
................... طفل ٍعلى وجهه تقاسيم البراءة والغــرام
واتذكرّك : ويشيخ قلب .. وبابك المقفل صريع
............. ماحدثتْــّه الشمس عن وجهـي ورمشك مستهام!
الماضي أجمل .. وانتظاري جف واتأخر ربيـع
.............. شكلي ابـ اتقـّدم عبث .. عشرين عام مْن الظلام!

1420هـ ــ القرى النائمة!
الرجوع أحياناً يكون حضارياً طفولياً جداً!

بندر المحيا · #4 05-07-2006, 02:21 AM

تكذبين
أنتي ودك تكذبين ..
فكذبتين ..
وقاطعتني! :
أنت عِشق ٍ مرّ في صوتي ببهجة
أنت لهجة
أنت
يابن الصمت مُهجة..
قلت: ويديني على قلبي ياعليا: تكذبين!
وقاطعتني:
أنت شاعر علّم النسيان وش معنى التذكر
أنت سكّر!
أنت تشبه وجه ابوي اللي قبل عامين وافته المنايا..
قبل مايدخل معَ ابواب الحنين
قلت: يمكن!
وساورت دمعه هدبها!
قلت : ممكن؟! :
أختصر كل السنابل والمناديل فيديني؟!
قاطعتني:
أنت ماتدري عن اثنين ٍ مشوا في بحر ليل
غيّبوا مثل الكلام اللي يغيب بشفةّ اللي ساكتين!
قلت:
عادوا؟!
جاوبتني:
عوّدوا ماهم اثنين!
قلت: ويـنـ....
وقاطعتني:
ياحبيبي أنت واحد من ثنين..
واركضت مثل الطهارة في خفوق امي، وانااا اندهـ:
يا يا ياعليا
أرجعي لي ..
أرجعيني!
أرحلي بي ..
أرحيلني ..
علّميني كيف كان ابوك يشبهني وانا رجل ٍ حزين ..

بندر المحيا · #5 05-07-2006, 02:26 AM

تزاحموا يبغون ديرة ونسيان
............. أحد ٍ ضَحَك واحد ٍ يخاف المقابيل
كانوا يقولون الغلابا فـ الاوطان
............أكثر كثير مْن السهارى ورى الليل
واحد سأل واحد: وش الخوف يافلان؟
............فلان قال: الخوف مثل المواويل!
جاوب أجابة غامضة كلها الوان!
............ضحك هذاك وقال مثل : المناديل..
و
.
.
.

وقلت اني حكيم بكلمة مامنّها حكمة ..
تمادوا في الحديث : الطاغي المُثخن بضحكتهم
وقفت وفي يدي فنجالهم
والصمت: قهْوتهم
ضحكت ..أكثر من اللازم
سكت أكثر من الحازم..
تحدثت بحنين ٍ
هزهم واستاق دمعتهم..
وكان الصوت: يظما
والحكي زمزم..
تحدوني وانا اتحدى جمود ٍ من جدل هارب!
وقلت:
الخوف ..
وهم يتّلفتون لبعضهم وافواههم: فمهم ..!
وقلت :
الخوف..
وكأن الدهشة البحر فنواظرهم وانا القارب
وقلت الخوف
رجل ٍ
راح يروي وارتوى
لكن ترك حبله على الغارب!

بندر المحيا · #6 05-07-2006, 02:29 AM

وشلون تقرون الملامح فيْ الاطفال؟!
................ من أول سْـطور البراءة إلى الخير؟!
يعني من الضحكة إذا لونها طال
...............وإلا من الغصن إن تطاير عصافير ؟!
وجيههم وعيونهم كحلها سال!
...............واحلامهم مرجوحة ٍ قلبها يطير !
تجمعوا في صدري البارح ومال
..............قلبي على ضحكاتهم والتباشير !
معهم كْوْر والعاب والعلك ابوريال!
...............وانا أنادي: يالصغار المغاوير :
ماشفتوا اللي مرّت الريح تختال
............... اللي على يدها تحط الـ عصـ افير

بندر .. دُبي 1426هـ

بندر المحيا · #7 05-07-2006, 02:32 AM

سر!
في فمي طعم انتظارك..
في فمي: أشهى قصيدة من نهارك..
طاعن في الحب فمي!
شارب ٍ
صوتك بدمي
شارب ٍ حتى خَضَارك..
واتذكّر
كنت اقول لفايز :
ان الحب وانت صغيّر احلى مْن انتصارك..
قال : جايز !!
كنت اقول لوجهك المُغرم:
ياعمّي..
يا .. يايمّي
ياانهزامي في المعارك..
أنت لما تحبّني أرجع ثلاث عـْقود من عمري لحالي ..
أرجع أكثر للغمام..
أرجع أكثر للحضارة
أصبح الشخص المثالي ..
أصبح المُشبع بقرية فيّها : بيت الحمام
في حدايقها: سنونو
في ظفايرها: صباح ٍ جدّل انفاسه ونام..
في رباها : جنون و ..
في نسايمها : غرام..
وردها يشبه حَمَارك:
وشمسها تشبه سؤالي!
وقلت لحظة:
أنا طفل ٍ في يمينك
أنا خاتم في حنينك!
أنا طفل ٍ يوقظه عِشقك ونارك..
يغتسل لاقام من نعناع حبك
ويْتناول من رغيف امه ويخرج
فيْ انتظارك..
ساورتـْه ظنون ..وايقن من يقينك..
حدّثته احلام ..
قال: وتعّرى من الضحكة ويسأل:
أنا يؤرقني سؤالي!
انت حبيت الصغير الصبّ
وإلا مجنون الهوى
"عُمْرو مْازارك"
ـــــ
1996م .. في الدار!