وليشرب نبيذ قصائدي العابرون!

بندر المحيا · #1 05-07-2006, 02:21 AM

تكذبين
أنتي ودك تكذبين ..
فكذبتين ..
وقاطعتني! :
أنت عِشق ٍ مرّ في صوتي ببهجة
أنت لهجة
أنت
يابن الصمت مُهجة..
قلت: ويديني على قلبي ياعليا: تكذبين!
وقاطعتني:
أنت شاعر علّم النسيان وش معنى التذكر
أنت سكّر!
أنت تشبه وجه ابوي اللي قبل عامين وافته المنايا..
قبل مايدخل معَ ابواب الحنين
قلت: يمكن!
وساورت دمعه هدبها!
قلت : ممكن؟! :
أختصر كل السنابل والمناديل فيديني؟!
قاطعتني:
أنت ماتدري عن اثنين ٍ مشوا في بحر ليل
غيّبوا مثل الكلام اللي يغيب بشفةّ اللي ساكتين!
قلت:
عادوا؟!
جاوبتني:
عوّدوا ماهم اثنين!
قلت: ويـنـ....
وقاطعتني:
ياحبيبي أنت واحد من ثنين..
واركضت مثل الطهارة في خفوق امي، وانااا اندهـ:
يا يا ياعليا
أرجعي لي ..
أرجعيني!
أرحلي بي ..
أرحيلني ..
علّميني كيف كان ابوك يشبهني وانا رجل ٍ حزين ..

بندر المحيا · #2 05-07-2006, 02:26 AM

تزاحموا يبغون ديرة ونسيان
............. أحد ٍ ضَحَك واحد ٍ يخاف المقابيل
كانوا يقولون الغلابا فـ الاوطان
............أكثر كثير مْن السهارى ورى الليل
واحد سأل واحد: وش الخوف يافلان؟
............فلان قال: الخوف مثل المواويل!
جاوب أجابة غامضة كلها الوان!
............ضحك هذاك وقال مثل : المناديل..
و
.
.
.

وقلت اني حكيم بكلمة مامنّها حكمة ..
تمادوا في الحديث : الطاغي المُثخن بضحكتهم
وقفت وفي يدي فنجالهم
والصمت: قهْوتهم
ضحكت ..أكثر من اللازم
سكت أكثر من الحازم..
تحدثت بحنين ٍ
هزهم واستاق دمعتهم..
وكان الصوت: يظما
والحكي زمزم..
تحدوني وانا اتحدى جمود ٍ من جدل هارب!
وقلت:
الخوف ..
وهم يتّلفتون لبعضهم وافواههم: فمهم ..!
وقلت :
الخوف..
وكأن الدهشة البحر فنواظرهم وانا القارب
وقلت الخوف
رجل ٍ
راح يروي وارتوى
لكن ترك حبله على الغارب!

بندر المحيا · #3 05-07-2006, 02:29 AM

وشلون تقرون الملامح فيْ الاطفال؟!
................ من أول سْـطور البراءة إلى الخير؟!
يعني من الضحكة إذا لونها طال
...............وإلا من الغصن إن تطاير عصافير ؟!
وجيههم وعيونهم كحلها سال!
...............واحلامهم مرجوحة ٍ قلبها يطير !
تجمعوا في صدري البارح ومال
..............قلبي على ضحكاتهم والتباشير !
معهم كْوْر والعاب والعلك ابوريال!
...............وانا أنادي: يالصغار المغاوير :
ماشفتوا اللي مرّت الريح تختال
............... اللي على يدها تحط الـ عصـ افير

بندر .. دُبي 1426هـ

بندر المحيا · #4 05-07-2006, 02:32 AM

سر!
في فمي طعم انتظارك..
في فمي: أشهى قصيدة من نهارك..
طاعن في الحب فمي!
شارب ٍ
صوتك بدمي
شارب ٍ حتى خَضَارك..
واتذكّر
كنت اقول لفايز :
ان الحب وانت صغيّر احلى مْن انتصارك..
قال : جايز !!
كنت اقول لوجهك المُغرم:
ياعمّي..
يا .. يايمّي
ياانهزامي في المعارك..
أنت لما تحبّني أرجع ثلاث عـْقود من عمري لحالي ..
أرجع أكثر للغمام..
أرجع أكثر للحضارة
أصبح الشخص المثالي ..
أصبح المُشبع بقرية فيّها : بيت الحمام
في حدايقها: سنونو
في ظفايرها: صباح ٍ جدّل انفاسه ونام..
في رباها : جنون و ..
في نسايمها : غرام..
وردها يشبه حَمَارك:
وشمسها تشبه سؤالي!
وقلت لحظة:
أنا طفل ٍ في يمينك
أنا خاتم في حنينك!
أنا طفل ٍ يوقظه عِشقك ونارك..
يغتسل لاقام من نعناع حبك
ويْتناول من رغيف امه ويخرج
فيْ انتظارك..
ساورتـْه ظنون ..وايقن من يقينك..
حدّثته احلام ..
قال: وتعّرى من الضحكة ويسأل:
أنا يؤرقني سؤالي!
انت حبيت الصغير الصبّ
وإلا مجنون الهوى
"عُمْرو مْازارك"
ـــــ
1996م .. في الدار!

بندر المحيا · #5 05-07-2006, 02:36 AM

نعم، يمه رسالات النبوة في زمان الياس
............. أعْرْف ان المُعلم فيْ المدارس نبأ رْسَالة..
صغار ٍ يسألوني عن كليب وغدرة الجساس!
............. وأنا مثل الذي يبرد على التفكير فـي حاله!
أشيل الأرض في جيوبي! وأجمّع للحنين انفاس
.............. وطبشور ٍ نعس في يْديّ ماجا الحلم في باله!
أنا هذا يايمه شاعر ٍ صمته مْن الألماس!
..............ولامنه حكى ترقص قـْهْوته فوق فنجـاله!
ولامنه
حكى
ترقص
قـْهْوته
فوق
فنجـاله!

بندر المحيا · #6 05-07-2006, 02:40 AM

كنت انا ورائد .. نحاول
نخفي المجهول في رمل الحقيقة..
قلت : أنا نخل وضحكت!
قال: أنا نخل وضَحك!
قلت : تجرحك العواذل؟!
قال: ترسم بعض ضيقة ..
وأفترقنا ..
ومات رائد في القرى لكن مماته
كان يشبه للنخيل ..
مات واقف ..
مات رايد ..
مات ويدينه ظلال ٍ للشوارع
مات وأنفاسه رياح ٍ موسمية..
مات واحلامه رطب كل الطفولة
مات
بعد ما علّم حنين الناس وش معنى القرايا
كيف تفْقْده القرايا
..وكيف نفقد هالقرايا ..

بندر المحيا · #7 05-07-2006, 02:42 AM

وكنت واقف لـ انتظارك!
ونصفي لنصفي ندهني:
أجلس أوقف
أجلس أوقف
أجلس أوقف
لاتناظر عن يمينك
فيه حاسد عن يسارك!
و أنتِ في عيونك: كراسي
كنت فيها العب مع الذكرى وصمتي والمدى:
لعبة كراسي!
وآهـ منك وآهـ مني
قلت وانت تطالع جراحي...
قلت وإلاّ كنت ساكت!
ايوه ايوه..كنت ساكت
وكنت انا اتكلّم لوحدي
مو مهم!
أفرض اني
واجتمع صوتي وانا طالع لـ برّى!
واختفيت لوحدي امشي
امشي
امشي امشي
امشي امشي امشي
امشي امشي امشي امشي
وانا جالس!
ليه دايم يرتبط تفكيرنا بالمشي ولْهاث الخطاوي!
اآء
ايوه ايوه
:تشبه الافكار أسراب النوارس
والعقل: الجناح
والتنحنح ريش
والتفكر: رفرفة فالغيم
ولسّى جالس
واختفيت وكنت وحدي
وادخل يديني بمخباتي، ملل ماادري فراغ!
كان في المخبا: دموع ٍ بيْض ..وحفنة من دراهم
مع بكت أبيض وصورة
وكانت الصورة: جريئة!
كانت أسود فـ أبيض وأكثر!
وقلت ابا آقف!
وصرت واقف لـ انتظارك!
ونصفي لنصفي ندهني:
أجلس أوقف
أجلس أوقف
أجلس أوقف
لاتناظر عن يمينك
فيه عاذل عن يسارك!
و أنت في عيونك: كراسي
كنت فيها العب مع الذكرى وصمتي والمدى:
لعبة كراسي!
.
.

وكنت امارس كل هذا!!
فــ شهر مارس!!