|
.gif)
مجلة الخيمة
 حوار الخيمة
دليل المواقع
نخبة المواقع
Muslim Tents
|
|
التسكين المجاني
التسكين المدفوع
سجلات الزوار
بطاقات الخيمة
للإعلان في الخيمة
|
| الأسئلة الشائعة | قائمة الأعضاء | التقويم | البحث | مواضيع اليوم | جعل جميع المنتديات مقروءة |
|
|
|
#1
15-10-2002, 07:41 AM
|
|||
|
|||
تروه مو انا اتفقنا ...
بصراحة ما لقيت عنوان مناسب للموضوع..لأنه متشعّب ويتطرق لأمور كثيرة...
رجعت اليوم للبيت عقب المغرب تافل العافيه بعد عناء يومٍ طويل... ومن يوم ما دخلت الصاله بدأت في ممارسة الطقوس المعتاده.... فَنطلت الشماغ على الكنبه.... وسفيت النعلة وغمضت عيوني احتريها تصبخ في دولاب الكنادر اللي تحت الدرج.... عشان اطرب سمعي باللحن العذب طخخخخخخخخ اذا قربعت في الدالوب لكن ماش ابطى الصوت ما طلع ...... آآآآآآآآآآآآآآآآآآآآآآآآآه دوّت الصرخه في الصاله ....فتحت عيوني وايلا النعلة متنصفه في جبهة كائن بشري.... ما قدرت اشوف اوصافه... لأن الزبيريه كانت مغطيه الشاشه.... بس اللي قدرت الاحظه انها امّيشه شعرها ولابسه مزلط وطالعه عضودها تلق بياض... التفت وايلا الصاله تخترش حريم... وكلهن يناظرون فيني شوي وتصرخ وحده :- هوووووووووو رجاااااااااااااااااااااااااال...!!!!!!! قعدت اتلفت ادوره ما شفت احد... المهم ويتراكضن هالحريم كل واحده في جهه ..الا مسيكينه وحده دبا ما قوت تركض... فتوزت ورا الستاره لكن بقدرة قادر وصلت الستاره لنص الصاله .... من بد الحريم كان فيه واحده تمشي مليون وناصيتني... قالت:ميامي وجععععععععع .... طرت من قوة الصرخه وبنطت في جدار الحوش... وطلعت جدتي وعطتني دش: ياللي ما تستحي على وجهك ....وش هالسواة فشلتنا الله يفشلك... قلت:عسى موب المفروض اني انا اللي اتغطى وانا ما دريت الله يسلمس؟؟ قالت:-الله لا يسلم فيك عظمة..انقلع برا ولا عاد تقبّل الا تالي الليل ... ودخلَت وصفقَت بالباب الداخلي من ضيقة الصدر..... وقفت في الحوش حاسر الرأس كسير القلب حافي القدمين ..... الصراحه كسر القلب ما همني جعله كسر ما يجبر لكن مواطن ارستقراطي مثلي يطلع حافي قويه ... جيت ابطلع مع الباب وما دريت الا قرررربع شي صبخني مع راسي ولاها لوحه مكتوب عليها ممنوع دخول الرجال قطعيا وقالت جدتي:علقها على الباب... قلت:- ما تبين اضلل القزاز واكتب مشغل نسائي؟؟؟ كالعاده سفهتني ودخلَت... والحين وش اسوي ملزوم بنعال....وش ازين محل القى فيه تشكيله واسعه من احدث انواع الاحذيه وباسعار منافسه؟؟؟؟؟ مافيه غيره المسجد نصيت المسجد ودخلت وايلاه فاضي.. المشكله ماحناب حول صلاة.... <<---طبعاً الدمجة ذي ما تخلا من الطلعات المفيدة... فتحت المكرفون واذنت(عسى ما علي فيه من الله ) كلها ثلاث دقايق وايلاالمسجد يخترش وجوك شياب المعذر كل واحد يدربي دمجته واللي يقول :- ايه يا ابو ناصر..هاذي من علامات الساعه ماعاد في الوقت بركه... والثاني يقول:- ايييييه ما عاد اهنا بين عشوين ..... حطيت يدي على خشمي تسني مرعف وانسحبت وقعدت اتمقل في الخيارات المتاحه من كنادر بالي وميلانو...ومن بين هالجيوش من الجزم تألقت نعلة باتا(اللي عند السقاف) فريده من نوعها... قالت لي بلسان الحال لا لسان المقال:ميلانو ايه اللي انتا قاي تئول عليه؟؟ لبستها وانحشت وانا اقول من هالدلخ اللي يجيب نعلة باتا للمسجد...؟؟ انا نعلتي الباتا صاكن عليها في التجوري... وما البسها الا في العيد ...أو اذا بغيت اسافر بالطياره... المهم طلعت بالسياره وعبّيت التانكي وقمت بجوله بالسياره على ابرز الاماكن السياحيه في مدينة الرياض وقمت بالتقاط الصور التذكاريه معها...من مكتبة العبيكان الى درة الملاعب مروراً ببوفيه سعيد ..... ووزارة الداخليه وفوال الافراح .... المهم مع الدوران طحت في شارع اول مره اشوفه زحمه والعالم على رجليهم يمشون وينادون بعض باسماء غريبه فادي, مصطفى, ألفت, جهاد.. و كله عماير و تفوح منه ريحة الثوم.. واطلع دليل الرياض السياحي من الدرج والقاهم كاتبين (شارع الخزان - ابوشكيم تاون ) دنّقت ادور شريط احطه في المسجل ما لقيت شي زين واشغل الرادو ما دريت الا اصوات بواري طاط طاط طاط بيب بيب ارتبشت وقعدت احذف بالسياره يمين ويسار... احسبني حاد احد... واثره الشين ابو جبهه خالد غبار يغني :وحدانييي والئلب وحيييد.... وقفت على جنب التقط انفاسي من الروعه ويجيني جندي مكمّل باللبس الجديد والصديريه الفسفوريه ام لمبات خفت وش ابقول له؟؟ قال: معك اشتراك؟؟ ((الظاهر ان المبات اللي في الصديريه عيّت تشتغل شكل يبيلها اشتراك)) قلت: لا والله ما معي و طلعت..... واطيح في شارع موحش اسود من سواد الليل واقف عند الاشاره وافتح الدليل مكتوب (غبيره افينيو)....وحاطين جنبه ملاحظه: المنطقه غير آمنه بعد الثامنه مساءاً كان الظلام مدمّس.... ففتحت الدريشه كود اشوف شي....واسمع اصوات ناس يتكلمون...... بس ما اشوف احد : يا ام الهكّي... ثمن سمعت صوت حسيت انه قريب مره يقول: فيه حوطي شاف موستنق كشف قال اقطع يدي ان كان اللي كانوا فيها حيّين.... فجأه كشح في وجهي نور ساطع لبست النظاره الشمسيه ويلا فيه اثنين لو ياقف جنبهم رضا تكر يطلع تسنه قشطه ويضحكون وسنونهم تلق بياض ( <--كذا) كل واحد منهم لابس كوت جلد وسروال سنه(لزوم السعوده ) وفوق روسهم شي اسود ملفلف محسوب عليهم شَعَر.... لا ومن زين الطبايع ....واحد منهم معه مشط حديد يقاله بيكدّه ..... وكل واحد منهم على كتفه مسجل كبر قريح ..صاقعين به على ماكس مشغلين بديّع مسعود ويشكشكون... المهم الوضع كان يروع فطلعت من الشارع وجيتك راجع للبيت وانا اتعوذ من بليس واقرا المعوذات.... والله وتولع علي لمبة البنزيم ...وش السالفه؟؟؟ توني معبي فُل.... سفطت عند نفس المحطه اللي عبيت منها اول مره مادريت الا الهندي يطق علي الدريشه اشرت له باصابعي عشره ريال طق الدريشه مره ثانيه ....ياوالله ابو هنود اللي ما يفهم.... فتحت الدريشه وقلت له عشره ريال ناظرني وقال:- انا معلوم عشره بس ترى موب حلا (حتى الهندي يعرف ترى موب حلا؟؟؟ ) صراحه قعدت افكر وش السواة في هالبنزيم .....من يوم شالوا الرصاص وهو يطير طيران..وواحد مثلي يحب السياحه بيتعب.... ماش لازم اشوف دبره تخليني اقعد ولا اطلع .... قعدت ادوج وانا افكر في حل للوضع الراهن ....ومن سكه لسكه ومن شارع لشارع لين الهمني الله الحل.... من حيث لم يخطر لي ذلك على بال (عشان تعرفون انها تجي على اهون سبب ) كنت واقف عند اشاره واشوف زبالة البلديه الكبيره... وتحتها قطو وقطوه يتبادلان الغرام صراحه انا بلّمت زي اي سعودي يشوف واحد وواحده يحبون بعض.... ما طلعت من الجو اللي كنت خاش فيه الا على اصوات البواري يوم اخضرت الاشاره .... مشيت وانا اقول ياحظهم تحققت امنيتهم بانهم اجتمعوا تحت زباله واحده ليت منهو يصير زيهم وفجأه لقيتني اصارخ لا شعورياً : هيّا دي هيّا دي... ماهنا الا العرس . اصلا الواحد وش يبي بحياة العزوبيه ؟؟ شريط عبادي الاخير سخيف ...وابو ظبي الرياضيه شفروها .....وبرقر كنق قام يخنبق ويحط سندويشات ما انزل الله بها من سلطان .... قلت يا ولد يا ميامي دق الحديد وهو حامي... يا قلبيييييييه ولعت لمبة البنزين ثانيه من جد صارت حلا (وليتها حلا شيحه كان ما خالفت) لكن شرهتك على اللي يعبيها هالمرّه... اصلا وش ابي بالسياره اذا اعرست مهبول اطلع من البيت؟؟.... الا يا طالع....... وفّرت الخمسين ريال وسفطت بالسياره على جنب ....وايلاي عند وزارة الداخليه وجاني هاك الوكيل رقيب يركض ويصارخ: حرررررك أم السياره قلت :اها بس ...حل عن سمايا السياره عندك سو بها اللي تبي... على مرّت خط بلده انا بس رفعت يدي ولا بغى الا هي سفط يمين خط البلده ودعس الوكيل رقيب... ركبت بريالين و رجعت البيت ونصيت جدتي.. وقلت بكل حنان : يمه!! قالت: هاه...؟؟؟ قلت: ابي اكمّل نص ديني ... قالت:كمّل وانا وش علي منك...؟؟ الحين انا قلت هاذي بتصيح من الفرحه وتقول انا عاوزه اشوف ولادك ئبل ما ربنا ياخُد امانتي.... ((أحب أعرفكم على جدتي الفنانة كريمة مختار)) لكن شكلها مابعد استوعبت الموضوع... قلت:يمه يعني ابي اعرس المفروض تفرحين وتقولين طب وتخيّر والفلوس لا تشيل همها ...بس صحيح جدات اخر زمن.... قالت:فلوووس؟؟ وانا وين اجيب لك منه؟؟ من طحانة امي؟؟ شف جدك عندك قل له... قلت: ووين جدي فيه..؟؟ قالت:في غرفته مقابل (تلف العيون) يشوف فلم السهره..!! قلت:وش هالتطويرات بداركم جدي يشوف فلم سهره؟؟موب سهل انور وجدي قالت:لااااا لا يروح مخك... بعيد اليوم الثلاثاء مقابل الجزيره الله يجزر اعمارهم .... اما يوم هالثلاثاء يوم غريب..... فيه اتفاقيه بينه وبين الشيّاب منول يجيبون لهم مصارعه..... والحين الاتجاه المعاكس .... دخلت على جدي.... والرجال لابس البجامه البنيه والطاقيه وقدامه ترمس قهوة و قاعد يفك كيسة معمول الكرامه بسنونه وماسكن التلفون ومتحمس ما بعد فتحت اثمي قال:اصصصصصصصص خل نسمع صبيت لي فنجال وقعدت اناظر معه.... حاولت اركز افهم وش القصه سمعت طراطيش كلام بس ما فهمت شي:الصحراء الغربيه,الجزائر,جبهة البوليساريو,المغرب, ماردك؟ ,لا هذا كلاااام خطير!!! صراحه فقيت خشتي والرجال مركّز قلت يبه : وش السالفه??. قال: انت ناظر بعدين اشرح لك اشوى.... فرجها الله جابوا الموجز... قلت: يالله اشرح لي... قال: هذولا وانا جدك .....جبهة البوليساريو يبون يستقلون عن المغرب... قلت: وراه؟ قال: هذولا انتم يا البوليساريو... راعين بر وكشتات وكانوا قبَل يفقعون في الصحراء الغربيه ..وجت حكومتهم وشبكوا الصحراء وقالوا محميه ....
__________________
<center>  <div style="width:100%;filter:glow(color=#C0C0C0,streng th=6);color:#535736"><font face="Simplified Arabic Backslanted" size=4> ... عسى&ى&ى ماشر ... ... دنيا غريبه ... وعالم اغرب ... سنوات العمر تمر ونفرح بمرها ... ولا نعلم بانها بشرى بقرب انتهائها no_way58@hotmail.com </font> </div> 
|
|
#2
15-10-2002, 07:45 AM
|
|||
|
|||
|
قلت: طيب انت وش حارقن رزك؟؟ ولا تبي تكشت عندهم؟؟
قال: الله يخلف على امّن جابتك ....اذا استقلوا بيصيرون يصدرون لنا الفقع ويطيح سعر اللي عندك... قلت: اها عشان كذا؟؟ بس يبه انا ابيك في موضوع اهم من هذا... قال :هاه؟؟؟انجز علي... ((جدي شقراوي ماله في طول الحكي)) قلت:الصراحه مادري من وين ابدا ..بس عاد... الكلمه اللي تستحي منها بدّها.... انا ابي اعرس.. قال: بشر امك...!!!!! عاد ان جيتوا للحق طالت وشمخت.... قلت:- شف عاد انت من يوم نجحت في اولى ثانوي محو اميه وشرينا لك الهايلوكس وانت شاينتن اخلاقك...... بعدين هالسلنتح اللي تماشيهم ترى ما جازوا لي... حسيت انه استحى على دمه شوي ....وقال :هذي الساعه المباركه وابشر بالعونه بس ان كان تبي رايي رح وجب سيارتك يا سرع ما بتحتاجها.... قلت :ابشر , نادى جدي جدتي وعلّمها وقال لها تدور لي بنت الحلال..... قلت: يمه من البنت اللي سفيتها بالزبيرية اليوم.....؟؟ قالت:هذي بنت ابو حمد جيرانا في ام سليم الله لا يجزاك خير..... نكدتا علينا وزهموا على ولدهم وجا خذهم ما تعشوا ..... الله يالدنيا ابو حمد هاك الصتيمه يجيب هالاشكال....؟؟ لكن من جد يدي الحلء للي بلا ودان .... عاد اللي يشوفني يقول اني شايفها زين.... وانا ما شفت الا عضودها بس عاد شكلي حبيتها من اول سفّه ..... بعدين حسيت ان البنت جذابه ولا ليش نصتها الزبيريه..؟؟ علمتهم اني ابيها وسألت جدتي وش اسمها؟ قالت: لمى .... اللللللللللللللللللللله لمى.....!!!!!! انا لو اسمع اسم هيله دخت .....واتزوج واحده اسمها لمى؟؟ من جد حظي تبسم لي ..... قعدت ساعه احلّق في دنيا الاحلام الورديه .....ما قطع علي افكاري الا صوت جدي: الوووووو ممكن اسأل مندوب الاخوان في البوليساريو.... هالحين الفقع اللي عندهم زبيدي ولا خلاسي؟؟؟؟ (لا تعليق) وطقيت الفنيلة العلاقي اللي يحبها قلبك...وسروال سنة جديد الظاهر انه من ((أو لا لا)) لأني كل ما صفّقت طاح... طبعا ...بدت جدتي المفاوضات باجراء اتصال ودي بام لمى....... بحثا فيه اخر المستجدات... في المنطقه والقضايا اللتي تهم البلدين ......وفي نهاية الاتصال وجهت ام لمى دعوة رسميه لجدتي.... لزيارتهم في بيتها الثاني وقد قبلت جدتي الدعوه ....على ان يحدد موعدها فيما بعد ..... عاد مسكتني جدتي على جنب وعطتني محاضره في فن الاتيكيت..... وكيف يجب التعامل في مثل هالامور وخصوصا السريه الكامله... انا طبقت تعليماتها بحذافيرها... حتى يوم رحنا نخطب ...سألوني اخواني وين بتروحون قلت: بنزور حرمتن مصخنه ..... المهم ...رحنا نخطبها وكان في استقبالنا ابوها ...وبعد القيام بواجب الضيافه حجر لي ابوها ....وعقدنا اجتماعا مغلقا واستلمني اسئله :انتا فين تشتغل؟؟ كم يعطونك؟؟ متى اخر مرة رقوك؟؟ وانا من الروعه ما اقوى اتكلم اهز راسي بس.... وفي النهايه قال الا انت تدخن؟؟ استجمعت كل شجاعتي وحاولت اتميلح عشان يحس اني خفيف دم قلت : ايه بس ما ادخن الا اذا فضى الرديتر..... يوم سمع الرد وهو اللي يحمّر وجهه وتنتفخ اوداجه قال: تشرب المخزي وتبي تاخذ بنات الحمايل.....؟؟ يامن شرى له من حلاله علّه... انا وش لي وش التميلح وشلون افهم هالثور اني امزح؟؟ قلت: خاليييي انكت ولا ما بعد فهمت؟؟ والله منيب ادخّن((استغفر الله)) اصلا دايم انا اشيّك موية الرديتر... عطاني نظره مليئه بالشك والتطريز .. وقال:ايلا نشدنا عنك نشوف هو مزح ولا جد... قلت بكل صفاقه: شف عاد اللي اوله شرط اخره اباجوره ان وافقتوا ابي اشوف البنت .. قال: ما يصير الا خير وعطونا فرصه وبنرد لكم خبر. ===سيطر القلق على ميامي خوفاً من أن يخسر لمى بسبب مزحته الثقيله اللتي لم يستوعبها الثور ابوها=== فيه ناس يحسبون العرس دعواً سهله ......يعني خذني جيتك.... ثمن اذا ما لقوا حرمتن ترضى ...قعدوا يقولون ماهنا نصيب..... والا قدموا معروض على وزارة الداخليه عشان يجيبون عنز سوريه .... فياجماعه قبل ما تطيح الفاس في القليب(هو موب كذا المثل؟؟ ) اعطوا الحر فرصه ..... وهذا اللي سويته... عيّنت جدي مدير حملتي الانتخابيه وابتدأت الحمله باقامة وليمه على شرف الامام والمذّن وتم توجيه الدعوه لشيّاب المعذر وكان السبب المعلَن للدعوه نقلاً عن جدي: والله ودنا نجتمع ما قط دخلتوا بيتنا .... ولكن عملاً بالحكمه القائله اطعم الاثم تمتلي اليدين زفر ... يوم قمنا من العشاء قال ابوي منتشياً بنجاح الخطه: ابشركم هذا ولدنا ميامي ندور له مره (واللبيب بالاشارة يفهمُ ) وكانت الخطوه الثانيه عمل معسكر مغلق في المسجد.... نقلت دالوب الملابس لمكتبة المسجد ونثرت اشغالي في انحاء المسجد ....صابون الحلاقه والامواس وفرشة الشعر فوق المكيف وكيسة الخبز الصامولي وجبنة الكيري ورا الباب والغسيل انشره على المراوح ولا اصلي الا بسروال سنه وفنيله واذا بغيت اواعد ربعي قعدنا عند الباب..... وشبينا السمر ودقينا بلوت ....يعني على بلاطه صرت دجاجه من دجاج المسجد... بعد مضي اسبوعين ...دق ابو لمى بعد العصر وزف لي البشرى ... قلت عاد وانا نافخ صدري ايه بس ابي اشوفها.. قال:حياك الله عقب صلاة العشاء ... قلت :طبعا باللي فيه(وين بلوت؟؟ ) سكت ما رد... قلت :يعني العشاء.... ضحك من غير نفس... بس عاد لازم يمشيها لي وين يلقى صتيمه مثلي ياخذ مدرسه على بند 105 ....لا ومعينه في مشاش السهول....؟؟ الصراحه انا دايم اسمع زاهد قدسي يقول الوقت بيمشي سريع عالفريق الخاسر ولا ايش رايك يابو مريم.....؟؟ ولا كنت افهمها لين صرت في هالموقف... قدامي اربع ساعات اعدّل فيها تراكمات من العاهات اللي تكونت على مدى عقود من السنين (تعتبر بسيطه في عمر الدول والشعوب ) طلعت على حلاقي الخاص محمد احسان ... وقلت شف يابو احسان : كل الابداعات اللي ابدعتها في راسي كوم وهالحلاقه كوم..... المسأله بالنسبه لي حياة او المنهل.... قال: ميامي... ما في خوف انتا معلوم برويز مشرّف؟؟ هزيت راسي بالايجاب قال: ما كان يضبط له السبعه الا انا ..... قلت : كفو والله عاد هالحين شغل لنا شريط ايلين بنت خلف بن هذال (يا حلاء اعمل لي غرّه** فرح لي ئلبي شي مرّه)خلّني اخش جو.... ما قصّر ابو احسان سوا شغل جبار في راسي ...وصنفر وجهي مع انه بغى يعيي .... يقول جب ورقة اصلاح مابي مشاكل مع المرور ... رجعت البيت ومليت البانيو... والله من زمان عنك يالمويه ....اخر مره داعبت فيها المويه اطرافي كانت يوم اخوض في فياض الصمان... يوم نكشت في اجازة الربيع وانا في ثالث ابتدائي.... واطمر للمطبخ واجيب علبة ساسا واكبها في البانيو عشان اصير كلّي ملح وقبله قعدت في البانيو العب ببطتي اللي تطلع صوت... ليييييييين صار لون المويه رمادي...(منيب قايل اسود التسذب خيبه ) طلعت من الحمام قالت لي جدتي:- ترى نسيبك دق فوق خمس مرات يدورك يقول ابيه ضروري ..... الله يعين شكله بيصير لزقه اللي يشب علي من الحين... دقيت عليه وقلت خير... قال : انت ما عندك جوال؟؟ لي ساعه ادورك... استحيت اقول ما عندي فصرفت الموضوع ... وقلت: خيران شاء الله..؟؟؟ قال:انت عندك جواز؟؟...... افااااااا صح اني احمر اعطر ومتأثر في كلامي بمازن الزيتوني صديقي في الابتدائي .....بس عاد موب لدرجة انه يشكك في انتمائي لهذا الوطن المعطاء .... قلت: سعودي طال عمرك وعندي جواز... .قال: جبه معك اليوم لا تنسى... قلت : خير وش تبي به..؟؟ قال: يا ولدي انا ما عندي بنات غير لمى وانت دخلت قلبي وابسفركم شهر العسل على حسابي ..جب جوازك عشان اطلع لكم التأشيرات والتذاكر مثلك خابر..... من جد ظلمت الرجال .....صار سنع ويعرف الواجب وعنده خير..... تزكرت وتطيبت واخذت الجواز وجيتك طالع.. وتصك في راسي هالحين ابناسب هالتجار..... وانا مطفّر لازم ما اخليهم يشوفون نفسهم علي... ثمن يطيح كرتي ....حتى بنتهم تشوف نفسها وكل ما تهاوشنا تقعد تقول ترى ابوي سفرك ابوي جابك ابوي طلّع لك تأشيرة خروج وعوده ..... مرّيت على مركز الاتصالات لقيت الجوال بثلاث مية وخمسين.. الا يا شاري, شريت سماعه بخمس وعشرين وعلّقتها وحطيت طرفها في جيبي والدعوى عِبِر (عِبِر من تمشية الحال وليس العبور او التعبير ) رحت لهم وقعدنا في المجلس ......وابوها يسولف من هالسواليف الماصخه: هالسنه ربيع .. عمك وين يشتغل؟ الرياض زحمه.... قلت: اقول الصراحه راحه... لمى ميب جايبه العصير؟؟؟؟ قام ورجع بعد شوي ودخلت اجمل المخلوقات البشريه (اهم شي بيضا ولا فيها ولا حبة خال والباقي طز) شايله طوفريه فيها العصير وجت ومدتها لي قلت :- لا الوالد قبل وابوها يقول لا في يدك المهم خذت كاس كان العصير ا للي فيه ملوّن اللي تحت أحمر وفوق أصفر... قلت ما فيه ملعقه؟؟ الظاهر ما حرّكتوه ... قالت : يا ربييييييه دمه خفيف يسوي نفسه ما يعرف عصير السن رايز... بأكون معاكم صريح...صح تشوفوني في المنتدى وسيع وجه...لكن عقب ما حكت قمط وجهي وطلع شكلي كنّي عاض على ليمونة...ثمّن ضاعت علومي.... ما ادري وش اقول قلت: الا عاد متى بتنقلين الرياض ومتى بيرسمونس؟؟؟ (ابووووك من موضوع رومانسي )ابتسمت ابتسامه خجوله ...وقالت: الله اعلم .. قال ابوها : يالله عاد وانا ابوتس شيلي العصير. جت طالعه قلت: لمى اذا خلص العشا نادينا(امون بقوه ) التفت علي ابوها.. وقال: عساك جبت الجواز؟ طلّعت الجواز ومديته له ابتسم ابتسامه صفراء وقعد يقلّب الجواز قلت : ما يمديك جوازي جديد ماعاد فيه اسم امي....(يلعن ابو التفكير) شانت نفسه وقعد يقلّب قال ما شالله كل هالديَر رايحن لها..... وقام يعد اسماء دوَل اوّل مره اسمع بها صراحه انبسطت ....عشان يعرف اني ولد نعمه منيب داخل على طمع.... وقعد يعد علي هالدوَل : بولندا( وش يوديني؟؟ اجيب حلاو بقر؟؟) النمسا , التشيك,هولندا (كليجا هولنديه؟؟) , كوريا الجنوبيه,الصين (سراويل سنه ماركة ابو بطه؟؟) , زيمبابوي,الكونغو الديمقراطيه لالالالالا قام يخور هالشايب ...... طمرت واخذت منه الجواز لقيته يقرا الدول المصرح بها قلت هالحين باذني باسفركم شهر عسل.... وانت ما تعرف تقرا الجواز؟؟ قال وانت مصدّق اني باسفرك انت ووجهك؟؟ انا ابي اشوف انت راعي سعسعه وسفرات ولا عاقل بناتنا مهنب بايرات نزوجهن دشير... ومعط مني الجواز وقلب على فيزة امريكا قال وش موديك ؟؟؟؟؟ صراحه انحرجت معه قلت:- شف الموضوع حساس بس انت في حسبة ابوي وبنصير اهل فباقولك الحقيقه ...الصراحه كنت في عمليّة تهريب لا واللي خطط للعمليه جدتي....
__________________
<center> <div style="width:100%;filter:glow(color=#C0C0C0,streng th=6);color:#535736"><font face="Simplified Arabic Backslanted" size=4> ... عسى&ى&ى ماشر ... ... دنيا غريبه ... وعالم اغرب ... سنوات العمر تمر ونفرح بمرها ... ولا نعلم بانها بشرى بقرب انتهائها no_way58@hotmail.com </font> </div>
|
|
#3
15-10-2002, 07:47 AM
|
|||
|
|||
|
الرجال فق خشته قلت: ايه وش فيك مطيّر عييناتك ؟؟ هرّبت تمر سكري في شنطه صمصونايط لاخوي اللي هناك ...ومثلك خابر السكري ما يتحمل الشحن ولو صادوه الامريكان يصادرونه يحسبونه قنابل C-4....
تفهم الرجال موقفي واكبر في روح الاصرار على الوصول بالتمر السعودي الى العالميه ... قلب الصفحه وايلا يوم تغير وجهه وقال: هلا هلا البحريييييين؟؟؟؟ يالداشر!!!!!! لا وفي رمضان؟؟؟ في هاك اللحظه كان شعوري كشعور اي قطو حجروا له اثنين من عيال النسيم في ربعه وكل واحد معه زبيريه... تمنيت الارض تنشق وتبلعني وحاولت ارد بس تلعثمت ....وفي النهايه قلت: والله لا تفهم غلط اصلا كنت ابودي جدتي تعتمر ولا لقينا حجز فطلعنا الرياض- المنامه-جده ... الرجال ما عطاني وجه قام يهوش ويلزخ بالعقال وانا انحاش وهو وراي لين وصلت السياره ...وشخطت قعدت ادوج وادوج واذكر انه ما عطاني جوازي ورجعت.... وطقيت الباب وركبت السياره وقفلت البيبان طلع الرجال ونسمت الدريشه... وقلت: جوازي عندكم ... ضحك الرجال وقال لاتخاف وانا ابوك تراي عصبت وسويت اللي سويته وانا مدري عن نفسي خذ جوازك قلت :طيب وتزوجني؟؟ قال: معصي بس انا رحمتك وعندي لك شور... وهمس في اذني بكلمات. قلت:- والله الظاهر هذا الحل طلعت من عندهم على شارع السويلم وشريت كراتين اقلام رصاص وحطيتها في السياره وصرت كل ما بغيت اعبي احط قلم في التانكي وسنستمر على هذا الحال لمدة خمس سنوات حتى اطلع جواز جديد ما فيه ولا تأشيره..... ملاحظة ... ترا هذا أطول موضوع قد كتبته...يعني لو تفصل الخط يكون أفضل... <<--- توك تعلمهم يالنذل... سلام
__________________
<center> <div style="width:100%;filter:glow(color=#C0C0C0,streng th=6);color:#535736"><font face="Simplified Arabic Backslanted" size=4> ... عسى&ى&ى ماشر ... ... دنيا غريبه ... وعالم اغرب ... سنوات العمر تمر ونفرح بمرها ... ولا نعلم بانها بشرى بقرب انتهائها no_way58@hotmail.com </font> </div>
|
|
#4
15-10-2002, 01:18 PM
|
|||
|
|||
|
السلام عليكم.........
<p align="Center"> لوووووووووووووووووووووووووووووووووووووووووووووول لووووووووووووووووووووووووووووووووووووووووووول لوووووووووووووووووووووووووووووووووووووووول لووووووووووووووووووووووووووووووووووووول لوووووووووووووووووووووووووووووووووول لووووووووووووووووووووووووووووووول لوووووووووووووووووووووووووووول لووووووووووووووووووووووووول لوووووووووووووووووووووول لووووووووووووووووووول لوووووووووووووووول لووووووووووووول </p> الله يوسع صدرك يا شيييييخ .. بس من جد هذي عجبتني حيل  إقتباس:
تحياتي و تشكوراااااااااااااااااااتي كلبوها 
__________________
|
|
#5
15-10-2002, 01:43 PM
|
|||
|
|||
|
ويوسع صدرك
تلاحظ محد رد الظاهر وصلوا لنص الموضوع وانتهى الاشتراك سلام
__________________
<center> <div style="width:100%;filter:glow(color=#C0C0C0,streng th=6);color:#535736"><font face="Simplified Arabic Backslanted" size=4> ... عسى&ى&ى ماشر ... ... دنيا غريبه ... وعالم اغرب ... سنوات العمر تمر ونفرح بمرها ... ولا نعلم بانها بشرى بقرب انتهائها no_way58@hotmail.com </font> </div>
|
|
#7
15-10-2002, 02:56 PM
|
|||
|
|||
|
ليه لا
سلام
__________________
<center> <div style="width:100%;filter:glow(color=#C0C0C0,streng th=6);color:#535736"><font face="Simplified Arabic Backslanted" size=4> ... عسى&ى&ى ماشر ... ... دنيا غريبه ... وعالم اغرب ... سنوات العمر تمر ونفرح بمرها ... ولا نعلم بانها بشرى بقرب انتهائها no_way58@hotmail.com </font> </div>
|
|
#8
16-10-2002, 09:56 AM
|
|||
|
|||
|
أخي.......عسى ما شر ...الله يسعدك ضحكتني وانا ما ودي أضحك 
__________________
<CENTER>  
|
|
#9
17-10-2002, 02:34 AM
|
|||
|
|||
|
السلام عليكم ...
تراني قرأيت الموضوع ..كله من طقق لسلام عليكم بالرغم أني ماأحب اقرأ المواضيع الطويلة .... بس ذا أستانست عليه وهذا الكلام كان البارح ... بس ماخلصت إلا وأنا تافله العافيه... وماصار فيني حتى أرد .... فرجعت اليوم علشان أرد ....  وأقول لأخونا .. عسى ماشر ... الله يبسطك دنيا وآخره قل آمين...
__________________
|
|
#10
18-10-2002, 04:44 AM
|
|||
|
|||
|
بريق الماس
وانا ما ودي امد لساني سلام
__________________
<center> <div style="width:100%;filter:glow(color=#C0C0C0,streng th=6);color:#535736"><font face="Simplified Arabic Backslanted" size=4> ... عسى&ى&ى ماشر ... ... دنيا غريبه ... وعالم اغرب ... سنوات العمر تمر ونفرح بمرها ... ولا نعلم بانها بشرى بقرب انتهائها no_way58@hotmail.com </font> </div>
|
 |
«
الموضوع السابق
|
الموضوع التالي
»
| عدد الأعضاء الذي يتصفحون هذا الموضوع : 1 (0 عضو و 1 ضيف) | |
| خيارات الموضوع | بحث في هذا الموضوع |
| طريقة العرض | |
النمط الشجري
|
|
